Новӧй Бор (Чилимдін район)
| Посёлок | |
| Новӧй Бор | |
|---|---|
 | |
| 66°43′07″ с. ш. 52°18′40″ в. д.GЯO | |
| Страна |
 Россия |
| РФ-са субъект | Коми Республика |
| Муниципальнӧй район | Чилимдін |
| Сикт овмӧдчӧмин | Новӧй Бор |
| История да география | |
| Лӧсьӧдӧма | 1908 во |
| Шӧрин вылна | 22 м |
| Час кытш | UTC+3:00 |
| Йӧз | |
| Олысь лыд | |
| Официал кыв | коми, роч |
| Лыдпаса идентификаторъяс | |
| Телефон код | +7 82141 |
| Пошта индекс | 169495 |
| ОКАТО код | 87252825001 |
| ОКТМО код | 87652425101 |
|
|
|
Новӧй Бор (рочӧн Новый Бор) — Коми Республикаса Чилимдін районын Новӧй Бор сикт овмӧдчӧминлӧн административнӧй шӧрин.
Ним артмӧм
А. П. Афанасьев чайтіс, мый Новый Бор нимыс вуджӧдӧма веськыда коми кывйысь, Выльяг нимысь[2].
География
Посёлокыс меститчӧма Коми Республикаса рытыв-войвылын, Печӧра юлӧн берегын.
- Час кытш
Новӧй Бор, кыдз и ставнас Коми Республика, меститчӧ МСК (москваса кад) час кытшын. UTC серти кадыс торъялӧ +3:00 вылӧ[3].
История
Новӧй Бор посёлок артмӧдісны Чилимдін сиктса олысьяс, а подув пуктысьнас лыддьыссьӧ Иван Абрамович Дуркин. Сылӧн батьыс — Дуркин Абрам Поликарпович 1850 воын лӧсьӧдіс Абрамовка грезд. Керкаясыс сэні сулалісны Печӧра ю берегын. Тулыснас юыс ойдліс да мыськаліс берегъяссӧ, Абрамовкаын лоисны неминучаяс. И сэки Иван Абрамович Дуркин босьтчис корсьны места выль овмӧдчӧм вылӧ. Сылы сьӧлӧм вылас воис Печӧра шуйга берегвывса яг. Берегыс вӧлі джуджыд, а гӧгӧр быдмисны зэв гырысь ниаяс, козъяс да кыдзьяс. 1908 воын Иван Абрамович разьӧма Абрамовкаысь ассьыс керкасӧ да вӧвъясӧн нуӧма сійӧс тайӧ местаас. Тадзи 1908 вося косму тӧлысь 25-ӧд лунӧ кыпӧдӧмаӧсь медводдза керка, коді лоис Новӧй Бор сиктлы подулӧн[4].
1917 во кежлӧ артмӧма вит керкаа неыджыд хутор. 1917 вося рака тӧлысьын вӧр кералӧм дырйи Иван Абрамович пӧгибнитӧма. 1931 воӧдз Новӧй Бор грездын вӧлӧма 7 керка[4].
1931 вося гожӧмын заводитісны стрӧитны Чилимдін районса Новӧй Бор да Харъяга спецпосёлокъяс, кодъясӧс кӧсйисны сетны Ухтпечлаглы (77 №-а совхоз). Печӧра ю дорын 77 №-а совхоз лӧсьӧдӧм йылысь постановление вӧлі примитӧма 1929 воын ВКП(б)-лӧн Кардорса обкомӧн. Планируйтісны котыртны эз прӧстӧ ыджыд совхоз, а совхоз-гигант, кодлы ковмас зэв уна уджалысь.
«Новый Бор» совхозыс вӧлі артмӧдӧма Кардор да Вӧлӧгда обласьтъясысь кулакалӧм крестьянаысь. Налы коліс стрӧитны аслыныс керкаяс да овмӧс. 1932 вося тӧвшӧр тӧлысь 1 лун кежлӧ Новӧй Борын вӧлі 1580 спецпереселенеч, а 1932 вося ода-кора тӧлысь 1 лун кежлӧ — 1556[5].
1933 во кежлӧ спецпереселенечьяс стрӧитісны Новӧй Борын 6 кык судта керка, 5 скӧт видзанін, 4 силос башня, ва сетан башня, конюшня, вый вӧчан завод. 1933 воын совхозыс вӧлі Ухтпечлаг системаын.
Сёрӧнджык, 1940-ӧд воясӧ нин совхозын уджалысьяслӧн да лагерын пукалысьяслӧн лыдыс лоис уна национальностя: рочьяс, украинечьяс, белорусъяс, финнъяс, литовечьяс, латышъяс, эстонечьяс.
1940-ӧд воясӧ «Новый Бор» совхоз сетісны НКВД-лӧн Вӧркутаса юкӧнлы. Совхоз вайліс Вӧркутаӧ яй, йӧлысь вӧчӧм прӧдуктаяс, град выв пуктас, помидор, ӧгурцы. Ставсӧ тайӧс быдтісны да вӧчисны Полярнӧй кытш сайын, экстремальнӧй условиеясын[6].
1939 до 1940 воын совхозсӧ петкӧдлісны Ставсоюзса выставка вылын[5].
1946 воын Печӧра юыс зэв ёна ойдліс, и уна йӧз локтісны овны Новӧй Борӧ.
Посёлокын оліс да уджаліс Сӧветскӧй Союзса Герой Черепанов Сергей Михайлович[7].
1959 воын посёлокын оліс 1395 морт, 1970 воын — 1351 морт, 1979 воын — 1331 морт, 1989 воын — 1260 морт, 1992 воын — 1177 морт, 1995 воын — 1171 морт[5].
2008 воын пасйисны посёлоклы 100 во тырӧм[8].
Йӧз
Медводдза овъяс
• Дуркин.
Инфраструктура
Посёлокын уджаліс «Новӧй Бор» ВАК, сійӧ вӧчис яй, йӧв, вый, нӧк, рысь. Сідзжӧ организацияыс видзӧдіс тӧвся туйяс бӧрся, пӧжаліс нянь да заптіс пес, кӧрым.
Посёлокын эм челядьлы сад, клуб, уна вузасянін, шӧр школа, библиотека, больнича. Эм уджвывса да войнаса музей.
Нималана йӧз
• Черепанов Сергей Михайлович — Сӧветскӧй Союзса Герой;
• Марков Александр Изосимович — Чилимдін районса Почёта гражданин (23.06.2011);
• Осташова Нина Томасовна — Чилимдін районса Почёта гражданин (04.07.2017);
• Шпикина Елена Сергеевна — Чилимдін районса Почёта гражданин (28.06.2018)[11].
Пасйӧдъяс
- ↑ https://rosstat.gov.ru/storage/mediabank/Tom1_tab-5_VPN-2020.xlsx
- ↑ Афанасьев А. П. Топонимия Республики Коми: Словарь-справочник. — Сыктывкар: Коми книжное издательство, 1996.
- ↑ Федеральный закон от 03.06.2011 № 107-ФЗ «Об исчислении времени», статья 5 (рус.) (15 сора тӧлысь 2025).
- ↑ 1 2 История (рус.). Администрация СП «Новый Бор». Шыӧдчан кадпас: 23 йирым тӧлысь 2025.
- ↑ 1 2 3 Жеребцов, 2001, с. 335.
- ↑ ГУЛАГ. Усть-Цилемский район (рус.). НБРК. Шыӧдчан кадпас: 23 йирым тӧлысь 2025.
- ↑ Возвращение Сергея Черепанова. Имя и подвиг бывшего спецпереселенца из приполярного поселка Новый Бор теперь увековечены в трех российских регионах. Шыӧдчан кадпас: 23 йирым тӧлысь 2025. Архивируйтӧма 5 рака тӧлысь 2016.
- ↑ В Усть-Цилемском районе отметили 100-летие поселка Новый Бор. Шыӧдчан кадпас: 23 йирым тӧлысь 2025. Архивируйтӧма 5 урасьӧм тӧлысь 2013.
- ↑ Всероссийская перепись населения 2010 года. Численность населения городских округов, муниципальных районов, поселений и населённых пунктов.
- ↑ https://rosstat.gov.ru/storage/mediabank/Tom1_tab-5_VPN-2020.xlsx.
- ↑ Почетные граждане (рус.). Администрация Усть-Цилемского района. Шыӧдчан кадпас: 23 йирым тӧлысь 2025.
Литература
- Жеребцов И. Л. Населённые пункты Республики Коми: историко-демографический сборник. — Москва: Наука, 2001.
- Жеребцов И. Л. Где ты живешь. Историко-демографический справочник. — Сыктывкар, 2000.
- История Коми с древнейших времен до конца XX века: В 2-х томах. — Сыктывкар, 2004.
- Республика Коми: Энциклопедия: в 3 томах. — Сыктывкар, 1997—2000.
.png)