Комсомольск-на-Печоре
| Посёлок | |
| Комсомольск-на-Печоре | |
|---|---|
 | |
| 62°08′16″ с. ш. 56°35′59″ в. д.GЯO | |
| Страна |
 Россия |
| РФ-са субъект | Коми Республика |
| Муниципальнӧй район | Мылдін район |
| Сикт овмӧдчӧмин | Комсомольск-на-Печоре (сикт овмӧдчӧмин) |
| История да география | |
| Воддза нимъяс |
1957 во — Тыбъю |
| Час кытш | UTC+3:00 |
| Йӧз | |
| Олысь лыд | |
| Официал кыв | коми, роч |
| Лыдпаса идентификаторъяс | |
| Пошта индекс | 169431 |
| ОКАТО код | 87236822001 |
| ОКТМО код | 87636422101 |
|
|
|
| komsomolsk-r11.gosweb.gosuslugi.ru | |
|
|
|
Комсомольск-на-Печоре (рочӧн Комсомо́льск-на-Печо́ре) — Коми Республикаын Мылдін районса посёлок. Комсомольск-на-Печоре сикт овмӧдчӧминлӧн административнӧй шӧрин.
Ним артмӧм
Посёлоклы татшӧм нимсӧ сетӧмаӧсь посёлоксӧ зiля стрӧитысь комсомолечьясӧс пыдди пуктӧм могысь[2]. 1957 воӧдз посёлокыс шусис Тыбъюӧн (Безволоснӧй юлӧн воддза нимыс)[3].
География
Посёлокыс меститчӧ Печӧра да Безволосная юяс ӧтлаасянінын налӧн шуйга берегъяс вылын, Мылдінсянь лунвылӧ 67 км (ю кузя 90 км) да Сыктывкарсянь асыввылӧ 308 км ылнаын.
Кытшалӧма пармаӧн. Посёлок дорын меститчӧ Джеболскӧй биару куйлӧд[3].
Посёлок пыр мунӧ Мылдінсянь лунвылӧ Знаменка да Якша посёлокъяслань автомашина туй. Асыввылӧ (паромӧн вуджанiн пыр) мунӧ Уньядiн сиктлань автомашина туй.
- Ывласям
Ывласямыс шӧркодь континентальнӧй, гожӧмыс дженьыд да ыркыдкодь, тӧлыс уна лымъя, кузь да кӧдзыд. Вогӧгӧрся шӧркодь температураыс −1,2 °C, та дырйи тӧвшӧр тӧлысьын шӧркодь температураыс −18 °C, сора тӧлысьын 16 °C. Ломтысян кадколастлӧн кузьтаыс 254 лун, суткинас шӧркодь температураыс −7,40 °C. Зумыд лым эшкын артмӧ шӧркодя йирым тӧлысь 26-ӧд лунӧ да сылӧ ода-кора тӧлысь 14-ӧд лунӧдз. Местаясын лым толаяслӧн шӧркодь джудждаыс воӧ 74 сантиметрӧдз. Медся джуджыд толаяс — 116 см, медся ляпкыд — 38 см[4].
- Час кытш
Комсомольск-на-Печоре, кыдз и ставнас Коми Республика, меститчӧ МСК (москваса кад) час кытшын. UTC серти кадыс торъялӧ +3:00 вылӧ[5].
История
1956 вося ода-кора тӧлысьын Печӧра берегӧ чеччис строительяслӧн медводдза отряд, медым стрӧитны выль оланін.
Комсомольск-на-Печоре посёлок 1956—1971 воясӧ пырис Знаменскӧй сельсӧветӧ. 1971 воын сельсӧветлӧн шӧринӧн лоис Комсомольск-на-Печоре посёлок. Сэки Комсомольскӧй сельсӧветӧ пырисны Якша посёлок, Знаменка посёлок, Мамыль посёлок, Комсомольск-на-Печоре посёлок. Исполкомса медводдза веськӧдлысьӧн лои А. М. Щемелев, коді уджаліс тайӧ чинын 10 воысь дырджык. 18 во исполкомса председательӧн, а сэсся администрацияса юралысьӧн уджаліс Т. В. Дубовицкӧй[6].
1956 во — СМК-лӧн контораӧн котыртӧма вӧр лэдзан завод, медводдза директорӧн индӧма И. Л. Эткин. Вӧр пилитан цехлӧн прӧдукцияыс муніс эз сӧмын районлӧн стрӧитчӧм вылӧ, но и муніс республикаса стрӧйбаяс вылӧ — Вуктылӧ, Усинскӧ, Печӧраӧ, Интаӧ, Вӧркутаӧ[6].
1956 во — восьтӧма биару участок, кодӧн веськӧдлӧма Г. И. Веселовскӧй. Джебольскӧй биару воис посёлокӧ[6].
1956 во — воссис пошта юкӧн, кодӧн юрнуӧдіс Н. И. Малинина. 1977 воын — АТС да радиоузел[6].
1957 вося сентябрь 1 лун — восьтӧма малокомплектнӧй начальнӧй школа. Школаӧн веськӧдлысьӧн лоис М. И. Сулеменко. 1965 воын вӧлі кыпӧдӧма школалысь типӧвӧй стрӧйбасӧ, лои шӧр школа[6].
1957 во — воссис здравпункт, сійӧ меститчис бараклӧн 2 жырйын. Котыртысьясыс — фельдшер В. Е. Бадокин да медсестра Б. А. Сысюк. 1958 восянь 1964 воӧдз стрӧитісны больничалы торъя стрӧйба. Тані восьтісны 10 койка вылӧ стационар, амбулатория. 1974 воын стационарыс содіс 35 койка вылӧ челядьлӧн отделениеӧн. Уна во участкӧвӧй больничаӧн веськӧдліс Коми АССР-са нимӧдана врач А. В. Зименко[6].
1958 вося тӧвшӧр тӧлысь 29-ӧд лунын восьтӧма детсад[6].
1960 вося тӧвшӧр тӧлысь 1 лун — котыртӧма Комсомольскӧй леспромхоз, кытчӧ пырисны Комсомольскӧй, Знаменскӧй, Якшинскӧй, Заостровскӧй лесопунктъяс. Медводдза начальникӧн индісны С. В. Максимович. 1975—1980 воясын вӧлі котыртӧма мехучасток, мыйӧн юрнуӧдіс М. А. Корычев[6].
1961 вося лӧддза-номъя тӧлысь 1 лун — котыртчис Комсомольскӧй ЛПХ-лӧн ОРС, медводдза начальникӧн лои К. А. Епифанов[6].
1971 во — котыртӧма лесхоз, кытчӧ пырисны нёль лесничество — Комсомольскӧй, Якшинскӧй, Курьинскӧй, Вылыс Печорскӧй. Медводдза директорӧн лоис В. В. Платов[6].
Йӧз
Пасйӧдъяс
- ↑ https://rosstat.gov.ru/storage/mediabank/Tom1_tab-5_VPN-2020.xlsx
- ↑ Туркин А.И. Топонимический словарь Коми АССР. Сыктывкар: Коми книжное издательство, 1986. (рус.). Коми кывтӧдӧм. Шыӧдчан кадпас: 25 моз тӧлысь 2025.
- ↑ 1 2 Комсомольск-на-Печоре. Топонимический словарь Республики Коми на сайте dutum.ru. Шыӧдчан кадпас: 23 моз тӧлысь 2025. Архивируйтӧма 9 ӧшым тӧлысь 2018.
- ↑ Городское поселение «Троицко-Печорск» Генеральный план. Том 2. Федеральная государственная информационная система территориального планирования (2018). Шыӧдчан кадпас: 23 моз тӧлысь 2025.
- ↑ Федеральный закон от 03.06.2011 № 107-ФЗ «Об исчислении времени», статья 5 (рус.) (15 сора тӧлысь 2025).
- ↑ 1 2 3 4 5 6 7 8 9 10 О муниципальном образовании (рус.). Администрация СП. Шыӧдчан кадпас: 25 моз тӧлысь 2025.
- ↑ Троицко-Печорский район. Троицко-Печорск. Краткая справка.
- ↑ Всероссийская перепись населения 2010 года. Численность населения городских округов, муниципальных районов, поселений и населённых пунктов.
- ↑ https://rosstat.gov.ru/storage/mediabank/Tom1_tab-5_VPN-2020.xlsx.
Литература
- Жеребцов И. Л. Где ты живешь: Населенные пункты Республики Коми. Историко-демографический справочник. — Сыктывкар, 2000.
- Республика Коми: Административно-территориальное деление на 1 августа 1992 г. Издание пятое.. — Сыктывкар, 1992.
- Республика Коми: Энциклопедия.. — Сыктывкар, 1997—2000. — Т. 1—3.
- Административно-территориальное и муниципальное устройство Республики Коми (на 1 августа 2006 г.). Издание шестое, официальное. — Сыктывкар: ГУ «ТФИ РК», 2006. — С. 278.
Ыстӧгъяс
- Комсомольск-на-Печоре сикт овмӧдчӧминлӧн сайт (рус.). komsomolsk-r11.gosweb.gosuslugi.ru.
| Мылдін районса оланінъяс | ||
|---|---|---|
 |
| |
