Жилин Валерий Васильевич

Рувикиын эмӧсь мукӧд йӧз йылысь статьяяс, кодъяслӧн овыс Жилин.

Валерий Васильевич Жилин
РФ-са Федеральнӧй собраниелӧн Федерация Сӧветӧ пырысь — РФ-са СФ ФС-ын Коми Республикаса канму власьт оланпастэчас органсянь петкӧдлысь
2014.10.24 — 2015.10.15
Водзвывса уджалысь	Е. А. Самойлов
Удж водзӧ нуӧдысь	В. П. Марков
Чужис	1944 вося сора тӧлысь 29-ӧд лун Черныб сикт, Удора район, Коми АССР, РСФСР, СССР
Ютыр	Единая Россия
Наградаяс

Жилин Валерий Васильевич (1944 вося сора тӧлысь 29-ӧд лун, Черныб сикт, Удора район, Коми АССР) — СССР-са КГБ-ын кадрӧвӧй офицер, Россияса вот полициялӧн генерал-майор, Федерация Сӧветӧ пырысь (2014—2015), Коми Республикаса Почёта гражданин.

Коми Республикаса Юралысьлӧн 2015 во моз тӧлысь 19 лунся 97 №-а Индӧдӧн сетӧма «Почёта гражданин» Коми Республикаса медвылыс почёт ним.

Олантуй

Чужис 1944 вося сора тӧлысь 29-ӧд лунӧ Коми Республикаса Удора районлӧн Черныб сиктын. 1963 воын помаліс Укваса лесотехническӧй техникум да заводитіс уджавны Удора районын Косланса вӧрпунктын. 1964—1967 воясӧ служитіс пограничнӧй войскаын, мый бӧрын заводитіс СССР-са КГБ-ын младшӧй лейтенант чинын. 1976 воын помаліс СССР-са КГБ-лысь Дзержинский нима Медвылыс школа, 1993 воын уволитӧма запасӧ Россия Федерацияса лёк суӧмысь видзан министерствоысь полковник чинын. 1994 воӧдз уджаліс Коми Республикаса инкассация веськӧдланінса начальникӧс вежысьӧн да «Комибанк» лёк суӧмысь видзан службаса начальникӧн, сэсся 2002 воӧдз юрнуӧдіс республикаса вот органъясӧн (медводз вӧлі вот полиция департаментса директорӧн, а 1995 восянь — Коми Республикаын вот полиция Федеральнӧй службаса Веськӧдланінса начальникӧн). 1995 воын сылы сетісны вот полицияса генерал-майор звание, 2002—2003 воясӧ веськӧдліс республикаса архив веськӧдланінӧн.

2003—2005 вояс — «СевЛесПил» ПАК-лӧн безопасносьт кузя консультант (Сыктывкар);

2005—2006 воясын уджаліс «Сырктывкархлеб» ВАК-лӧн корпоративнӧй сӧвмӧм серти директорӧн.

45 воысь унджык уджаліс канму власьт органъясын Коми Республикалы бур вылӧ. На пиысь 26 во служитіс Канму видзчысянлун комитет органъясын. Уна вын пуктіс, медым збыльмӧдны республика мутасын канму вот политика да сӧвмӧдны дінму парламентаризм.

Сійӧ 30 воысь унджык вӧлі власьтлӧн быд сикас тшупӧдын бӧрйӧм органъясса депутатӧн. Эз ӧтчыдысь сійӧс бӧрйывлыны депутатӧн Нимйӧза депутатъяслӧн Воркута карлӧн Сӧветӧ, Коми АССР-са Медвылыс Сӧветӧ. Коми Республикаса Каналан Сӧветӧ. 2007 воын Жилин босьтчис веськӧдлыны Коми Республикалӧн Каналан Сӧветса Оланпас пыртӧм да меставывса асвеськӧдлӧм кузя комитетӧн, водзмӧстчис сэтшӧм оланпас балаяс дасьтӧмын, кутшӧмъяс топыда йитчӧны парламентаризм сӧвмӧдӧмкӧд, гражданалысь инӧд да вӧля могмӧдӧмкӧд.

2013 вося кӧч тӧлысьын сійӧс индӧма Коми Республикалӧн Каналан Сӧветса Веськӧдлысьӧс вежысьӧн.

2014 вося йирым тӧлыссянь Валерий Васильевич босьтіс Россия Федерацияса Федеральнӧй Собраниелӧн Федерация Сӧветӧ пырысьлысь — Коми Республикаса Каналан Сӧветсянь петкӧдлысьлысь уджмогъяс; пырис Парламентса уджаланарт да удж котыртан комитетӧ. Жилинлӧн уджалан нырвизьясӧн вӧліны — бырӧдны мытшӧдъяс, мыйяс артмӧны Россияса экономика зумыдмӧдӧмкӧд йитчӧм экономическӧй могъяс решитӧм дырйи, видзны социальнӧй гарантияяс да сетны отсӧг видз-му овмӧслы, медициналы, велӧдчӧмлы.

2015 вося йирым тӧлысь 15-ӧд лунӧ Коми Республикаса Каналан Сӧветсянь выль сенаторӧн лоис Валерий Марков.

Наградаяс

• дас медаль,
• СССР-са КГБ-лысь куим Почёт грамота,
• Коми Республикаса Каналан Сӧветлӧн Почёт грамота,
• Россия Федерацияса Федеральнӧй Собраниелӧн Федерация Сӧветлӧн Почёт грамота;
• «Коми Республикаса нимӧдана уджалысь» почёт ним;
• Коми Республикаса Почёта гражданин ним.

Пасйӧдъяс

Ыстӧгъяс

• Жилин Валерий Васильевич  (неопр.). Энциклопедический справочник. Совет Федерации. Шыӧдчан кадпас: 22 рака тӧлысь 2019.
• Валерий Жилин наделен полномочиями члена Совета Федерации  (неопр.). Единая Россия. Шыӧдчан кадпас: 22 рака тӧлысь 2019.
• Жилин Валерий Васильевич  (неопр.). declarator.org. Шыӧдчан кадпас: 23 рака тӧлысь 2019.