Пеймер Михаил Николаевич
| Пеймер Михаил Николаевич | ||||||
|---|---|---|---|---|---|---|
 | ||||||
| Чужан лун | 1923 вося урасьӧм тӧлысь 19-ӧд лун | |||||
| Чужанін | Харьков | |||||
| Канму |
 СССР →  Россия |
|||||
| Наградаяс да премияяс |
|
|||||
Пеймер Михаил Николаевич (1923-ӧд вося урасьӧм тӧлысь 25-ӧд лун, Харьков[d]) — Айму вӧсна Ыджыд тышын участвуйтысь, офицер, кар стрӧитысь, Коми Республикаса Почёта гражданин (2024).
Коми Республикаса Юралысьлӧн 2024 во моз тӧлысь 19 лунся 98 №-а Индӧдӧн сетӧма «Почёта гражданин» Коми Республикаса медвылыс почёт ним[1].
Олантуй
Чужис 1923 вося урасьӧм тӧлысь 25-ӧд лунӧ Харьковын. 1934 воын семьяыс вуджис овны Ярославльӧ[2].
Айму вӧсна Ыджыд тыш заводитчигӧн Михаил Николаевич вӧлі Артиллерист-ракетчикъяслӧн 1 гвардейскӧй Москваса военнӧй училищеын курсантӧн. Курсантӧн участвуйтіс Москва вӧсна тышын. Сы бӧрын Брянскса фронт, кӧні сійӧс индісны 338-ӧд дивизионса огневӧй взводса командирӧн да 337-ӧд дивизионса разведкаса начальникӧн. А сэсся — веськыда Сталинградӧ, кӧні 19 арӧсӧн Михаил лои 336-ӧд дивизияса батареяса командирӧн[3], зырис вӧрӧгӧс Сталинград дорын. Участвуйтіс «Багратион» операцияын, мездіс Белоруссия, Литва, воюйтіс Асыввыв Пруссияын.
Михаил Николаевич Пеймерлы сетісны «Тышын заслугаясысь», «Смеллунысь» медальяс, Гӧрд Кодзув орден, но сылысь фронтвывса героическӧй туйсӧ нем жалиттӧг орӧдісны. Кенигсбергын 1945 вося урасьӧм тӧлысь 6-ӧд лунӧ Михаил Николаевичӧс арестуйтісны сыысь, мый сійӧ быттьӧкӧ нуӧдіс сӧвет власьтлы паныд агитация, мыждісны 58-10 статья серти (ч.2), да пуксьӧдісны 10 во кежлӧ Воркутлагӧ[4].
1945 вося лӧддза-номъя тӧлысьын этапӧн вайисны Вӧркутаӧ. Уджаліс 3 №-а шахтаын участокса проходчикӧн, маркшейдерӧн. 1948 вося рака тӧлысьын, кӧть сійӧ пыр на пукаліс дзескыдінын, Михаил Николаевичӧс индісны Рытыввывбокса стрӧитан шахтаясӧн выль стрӧитчан веськӧдланінын планово-производственнӧй юкӧнса начальникӧн. Сёрӧнджык уджаліс Вӧркута ю вылын пором стрӧитігӧн сменаса начальникӧн. Сооружениеыс сетіс позянлун могмӧдны карсӧ ваӧн.
Михаил Николаевичӧс лэдзисны дзескыдінысь 1952 вося ода-кора тӧлысьын, а 1965 вося лӧддза-номъя тӧлысьын сійӧс реабилитируйтісны да бӧр примитісны партияӧ.
Мездӧм бӧрас Михаил Николаевич уджаліс «Воркутдорстрой» трестын, «Печоршахтострой» комбинатын. Сійӧс индісны «Печоршахтострой» комбинатлӧн производственнӧй юкӧнса начальникӧн, 17, 18 да 25 №-а шахтаяс выльмӧдан пускӧвӧй комплексса начальникӧн. Стрӧитіс «Комсомольскӧй» шахта, Вӧркута карса очистнӧй сооружениеяс, Ва шонтан шӧр котельнӧй, Усва ю вылын ва босьтанінъяс. Веськӧдліс планӧ пырттӧм (народнӧй) стройкаясӧн. Тайӧ Вӧркута карса парк, Вӧркута аэропортлӧн лэбзян-пуксян полоса, Пионеръяслӧн двореч. Михаил Николаевичлӧн веськӧдлӧм улын стрӧитӧма Вӧркута карса да посёлокъясса став автомашина туйыс, аэропорт, выль шахтаяслы кӧрт туйяс, бурмӧдӧма-мичмӧдӧма шахтаяс, Вӧркута карса уличьяс, вӧчӧма Вӧркута да Аячьяга юяс вомӧн посъяс[5].
1984 воын пенсия вылӧ петӧм бӧрын вуджис овны Ярославльӧ.
Наградаяс
• «Тышын заслугаясысь» медаль,
• «Смеллунысь» медаль,
• Гӧрд Кодзув орден,
• «Сталинград дорйӧмысь» медаль,
• «Йӧзкост овмӧсын нимӧдана уджалысь» почёт ним,
• Коми Республикаса Почёта гражданин (2024),
• Ёртлун орден (2025)[6][7].
Пасйӧдъяс
- ↑ Глава Республики Коми Владимир Уйба подписал Указ о присвоении высшего почётного звания Республики Коми «Почётный гражданин» в 2024 году
- ↑ Сегодня свой 102-й день рождения встречает Михаил Пеймер ‒ человек с поистине удивительной судьбой, Администрация МО "Воркута". Шыӧдчан кадпас: 13 рака тӧлысь 2025.
- ↑ Михаил Пеймер. История в лицах, Региональная еврейская национально-культурная автономия Ярославской области. Шыӧдчан кадпас: 13 рака тӧлысь 2025.
- ↑ Ветеран Михаил Пеймер: «Со Шпектором дружили, но ругались как кошка с собакой», bnkomi.ru. Шыӧдчан кадпас: 13 рака тӧлысь 2025.
- ↑ Книга почёта Республики Коми
- ↑ Указ Президента Российской Федерации от 15.10.2025 № 728 «О награждении государственными наградами Российской Федерации» (рус.). pravo.gov.ru. Шыӧдчан кадпас: 18 йирым тӧлысь 2025.
- ↑ Первостроитель Воркуты получил Орден дружбы (рус.). БНКоми (17 йирым тӧлысь 2025). Шыӧдчан кадпас: 18 йирым тӧлысь 2025.
| 2011 во | |
|---|---|
| 2012 во | |
| 2013 во | |
| 2014 во | |
| 2015 во | |
| 2016 во | |
| 2017 во | |
| 2018 во | |
| 2019 во |
|
| 2020 во | |
| 2021 во | |
| 2022 во | |
| 2023 во | |
| 2024 во | |
| 2025 во | |
- Гӧрд Кодзув ордена кавалеръяс
- «Тышын заслугаясысь» медальӧн наградитӧмаяс
- «Отвагаысь» медальӧн наградитӧмаяс
- «Сталинград дорйӧмысь» медальӧн наградитӧмаяс
- Коми Республикаса Почёта гражданинъяс
- Персоналия анбур серти
- Чужисны урасьӧм тӧлысь 25-ӧд лунӧ
- Чужисны 1923 воын
- РУВИКИ:Ӧти кадӧ олысьяслӧн олантуй
- Вӧркута
- Вӧркута муниципальнӧй кытш