Молий Анна Яковлевна

Босьтӧма Рувикиысь
Рувикиын эмӧсь мукӧд йӧз йылысь статьяяс, кодъяслӧн овыс Молий.
Молий Анна Яковлевна
Молий Анна.jpg
Чужан лун 1909 вося урасьӧм тӧлысь 16-ӧд лун
Чужанін Баку
Кулан лун 1979 вося косму тӧлысь 12-ӧд лун
Куланін Уква кар, Коми Республика
Канму  Россия империя →  СССР
Мыйся уджыс директор
Ошканпасъяс да премияяс

Ленин орден Орден «Знак Почёта» Орден Трудового Красного Знамени Орден Трудового Красного Знамени «Уджын отличиеысь» медаль 

«1941—1945 воясся Айму вӧсна Ыджыд тышын Германияӧс вермӧмысь» медаль Коми Республикаса Почёта гражданин

Молий Анна Яковлевна (1909 вося урасьӧм тӧлысь 16-ӧд лун, Баку кар — 1979 вося косму тӧлысь 12-ӧд лун, Уква кар, Коми Республика) — Коми Республикаса мусир да биару промышленносьт котыртысь[1], Коми Республикаса Почёта гражданин (2022).

Коми Республикаса Юралысьлӧн 2022 во моз тӧлысь 5 лунся 89 №-а Индӧдӧн сетӧма «Почёта гражданин» Коми Республикаса медвылыс почёт ним (кувсьӧм бӧрын)[2].

Олантуй

Чужис 1909 вося урасьӧм тӧлысь 16-ӧд лунӧ Баку карын уджалысьяслӧн семьяын.

1933 воӧ помаліс «инженер-технолог» специальносьт серти Азербайджанса индустриальнӧй институт. 1940 воӧ А. Я. Молий локтіс Чибъю посёлокӧ, уджаліс Ухткомбинатса производственнӧй юкӧнын инженерӧн.

1942 воӧ Анна Яковлевна Молийӧс индісны Укваса мусир переработайтан заводӧ директорӧн да юралысь инженерӧн. Айму вӧсна Ыджыд тыш пансигӧн заводын уджыс муніс сьӧкыда. «Кокни» мусирсӧ кутісны перйыны этшаджык, установкаяс тырвыйӧ уджӧдӧм вылӧ сырьёыс эз тырмы. Анна Яковлевна вӧлі гӧгӧрвоӧ, мый фронтсӧ колӧ дугдывтӧг могмӧдны ломтасӧн, да шуис велӧдчыны вӧчны Ярегаса сьӧкыд мусирысь мукӧдтор. Та дырйи эз дугӧдчывны вузалӧм вылӧ прӧдукция лэдзӧмысь[3].

Война кадӧ А. Я. Молийлӧн юрнуӧдігӧн заводыс быдмис-сӧвмис да лэдзис выль прӧдукция: мавтасъяс, солидол, мазут. Заводса лабораторияын ярегаса мусирысь вӧчисны кынмытӧм мавтасъяс, татшӧмъясыс сэки эз на вӧвлыны. Заводсаяс уджалісны ӧтсӧгласӧн да ыстісны Ленинградӧ плансьыс унджык мусир да мукӧд ломтас-мавтас тыра матӧ 30 эшелон. Уджалысьяслӧн фронтлы отсасьӧмысь 1944 воын Укваса мусир переработайтан заводлы сетісны СССР-са оборона комитетлысь Гӧрд Дӧрапас. Анна Яковлевналы, кыдзи заводса директорлы, сетісны «Уджын бура петкӧдчӧмысь» да «Германияӧс вермӧмысь» медальяс. 1944 воын сылы сетісны Уджвывса Гӧрд Дӧрапас орден[3].

А. Я. Молий 40 во оліс Укваын, на пиысь 25-сӧ директораліс Укваса мусир переработайтан заводын да 12-сӧ юрнуӧдіс ВНИИГАЗ-лӧн Коми филиалын туялан лабораторияӧн. Сылӧн веськӧдлӧм улын дасьтӧма 30-ысь унджык наука-туялан удж. А. Я. Молий ачыс да уджъёртъясыскӧд ӧтлаын гижис 20-ысь унджык наука статья да публикация. Тайӧ уджъясын туялӧма Тимано-Печорскӧй провинцияса месторождениеясысь углеводороднӧй сырьё переработайтан мытшӧдъяссӧ, а сідзжӧ найӧс сиӧма кар сӧвмӧмлы[3].

Уджаліс Андрей Яковлевич Кремскӧд[4], 1969 воын найӧ гӧтрасисны [5].

1947 воын А. Я. Молийӧс бӧрйӧмаӧсь Коми АССР-лӧн Медвылыс Сӧветса депутатӧн. 1947 восянь 1951 воӧдз сійӧ вӧлі Коми АССР-лӧн Медвылыс Сӧветса Президиумын Веськӧдлысьӧс вежысьӧн[3].

А. Я. Молий кувсис 1979 вося косму тӧлысь 12-ӧд лунӧ Укваын[3].

Наградаяс

• «Коми АССР-са наукаын да техникаын нимӧдана уджалысь» ним (1949),
• «Коми АССР-са мусир да биару промышленносьтын нимӧдана уджалысь» ним (1960),
• «Наукаын да культураын нимӧдана уджалысь» ним,
• «Уква карса почёта гражданин» ним (1978),
• Ленин орден (1952),
• кык Уджвывса Гӧрд Дӧрапас орден (1944, 1951),
• «Почёт пас» орден (1959),
• «Бура уджалӧмысь» медаль (1943),
• «1941—1945 воясся Айму вӧсна Ыджыд тышын Германияӧс вермӧмысь» медаль (1946),
• ВДНХ-лӧн бронза медаль (1977),
• почёта нефтехимик (1979)
• уна мукӧд медаль.

Пасйӧдъяс

  1. ↑ Потолицын В. Молий Анна Яковлевна // Республика Коми. Энциклопедия. Том II. — Сыктывкар: Коми книжное издательство, 1999. — С. 292.
  2. ↑ Высшее почётное звание Республики Коми «Почётный гражданин» присвоено Евгению Алексееву и Анне Молий, Официальный сайт Республики Коми. Шыӧдчан кадпас: 24 рака тӧлысь 2025.
  3. ↑ 1 2 3 4 5 Книга почёта Республики Коми
  4. ↑ Легендарный директор, Почетный гражданин, Регион. Шыӧдчан кадпас: 24 рака тӧлысь 2025.
  5. ↑ Молий Анна Яковлевна - нефтяник, почетный гражданин г.Ухты, Наш Баку. Шыӧдчан кадпас: 24 рака тӧлысь 2025.

Литература

  • Плякин А. М., Федорович Р. Н. Заслуженные работники Российской Федерации // Ухтинцы — заслуженные работники России. — Ухта: Б. И., 2018. — С. 63—64. — 173 с.
  • Сергеева В. В., Векшина Т. А., Борисова И. К. Анна Яковлевна Молий. К 110-летию со дня рождения / под ред. В. В. Сергеевой. — Сыктывкар: Коми республиканская типография, 2019. — 208 с.
Босьтӧма "https://kv.ruwiki.ru/w/index.php?title=Молий_Анна_Яковлевна&oldid=479159"-ысь