Алексеев Александр Иванович

Босьтӧма Рувикиысь
Рувикиын эмӧсь мукӧд йӧз йылысь статьяяс, кодъяслӧн овыс Алексеев.
Александр Иванович Алексеев
Александр Иванович Алексеев.jpg
Чужан лун 1952 вося кӧч тӧлысь 30-ӧд лун
Чужанін  Уква, Коми АССР, РСФСР, СССР
Кулан лун 1996 вося моз тӧлысь 8-ӧд лун
Куланін  Грозный, Чечня, Россия
Канму  СССР →
 Россия
Войска сикас ФБС
Служитан вояс 1982—1996
Звание подполковник
Тышъяс/вӧйнаяс Чечняын медводдза вӧйна
Наградаяс да премияяс
Россияса Герой
«За трудовую доблесть» медаль «Бура служитӧмысь» III тшупӧда медаль Коми Республикаса Почёта гражданин
Логотип РУВИКИ.Медиа Медиафайлы на РУВИКИ.Медиа

Алексеев Александр Иванович (1952 вося кӧч тӧлысь 30-ӧд лун, Уква, Коми АССР, РСФСР, СССР — 1996 вося моз тӧлысь 8-ӧд лун, Грозный, Чечня, Россия) — Россия Федерацияса Безопасносьт службаса подполковник, Чечняын медводдза вӧйнаын участвуйтысь, Комиысь Россияса Герой (1996)[1][2]. Коми Республикаса Почёта гражданин[3][4].

Олантуй

Александр Алексеев чужис 1952 вося кӧч тӧлысь 30-ӧд лунӧ Уква карын[5].

Уква карса 3-ӧд номера шӧр школа бура помалӧм бӧрын Александр пырис велӧдчыны Укваса индустриальнӧй институтӧ: сійӧ кӧсйис лоны геологӧн, сы вӧсна мый вӧр-васӧ эз прӧстӧ радейт, а пыдди пуктіс. Но сылы эз тырмыны баллъясыс, и Алексеев кутіс велӧдчыны вӧр инженерӧ[6].

1975 воын, Укваса индустриальнӧй институтын велӧдчӧм бӧрын, Александр Алексеев уджалӧма «Коминефть» объединениеын инженерӧн, «Комигазпром» ПТО веськӧдланінса мастерӧн; сэсся служитӧма армияын.

1977 восянь сійӧ уджаліс Укваса индустриальнӧй институтын научно-исследовательскӧй секторын инженерӧн, а 1980 вося урасьӧм тӧлыссянь заводитіс уджавны индустриальнӧй институтын ВЛКСМ комитетса секретарӧн. Институтса студенческӧй строительнӧй отряд, кодӧн сійӧ веськӧдліс, вӧліс республикаын медбуръясысь ӧтиӧн[7]. Буретш А. И. Алексеевлӧн вӧлі мӧвп сетны нажӧвитӧм сьӧмысь джынсӧ Айму вӧсна Ыджыд тышын усьӧм уквасаясӧс казьтылан пас сувтӧдӧм вылӧ, сійӧс восьтісны 1980 вося ода-кора тӧлысьын[6].

СССР-са КГБ-лӧн органъясын 1982 восянь. Алексеев служитіс КГБ горотделса оперуполномоченнӧйӧн Уква карын, сэсся Коми АССР-са Сосногорск карын КГБ отделениеса старшӧй оперуполномоченнӧйӧн да начальникӧн. Помаліс Минскын СССР-са КГБ-лысь Высшӧй курсъяс.

1993 воын подполковник Александр Алексеевӧс индісны Коми Республикаын ФСК (бӧрынджык ФБС) управлениеын кадръясӧн веськӧдланінса начальникӧн[7], и сійӧ семьянас воис Сыктывкарӧ.

Чечняын

Александр Алексеев ас кӧсйӧм сертиыс вӧзйысис старшӧйӧн республикса ФБС-ын уджалысьяс группаын, кодъяс мӧдӧдчисны командировкаӧ Чечняӧ[7].

1996 вося урасьӧм тӧлысьын группа меститчис Грозный карын ФБС-лӧн общежитиеын. Кор Алексеевлӧн командировкаыс вӧлі помасьӧ нин, 1996 вося моз тӧлысь 6-ӧд лунся асывнас Грозный карӧ пырис чечен сепаратистъяслӧн ыджыд группировка, коді «Джихад» операция дырйи босьтіс карлысь зэв колана магистральяс да медтӧдчана инъяс[7].

ФБС-лысь общежитие вылӧ, кӧні вӧлі 90 сотрудник, оружие да колана документъяс, уськӧдчисны боевикъяс. Найӧ вӧзйисны пытшкас йӧртӧм йӧзлы сетчыны, мунны ас йӧз дорӧ ӧружьеӧн либӧ вуджны на дор сьӧм вылӧ, но ФБС-ын уджалысьяс ӧткажитчисны. Алексеев кыдзи звание серти старшӧй босьтіс ас вылас командованиесӧ да котыртіс дорйысьӧмсӧ. Кык сутки чӧж «Вымпел» группаса боечьяскӧд ӧтвылысь майор Сергей Ромашин юрнуӧдӧм улын бӧрыньтӧдісны боевикъяслысь атакаяссӧ. А. И. Алексеев кыкысь ранитчис, но медицина отсӧг сетӧм бӧрын бӧр тышкасис[7].

1996 вося моз тӧлысь 8-ӧд лунся войӧ Алексеевӧс виис снайпер, кор сійӧ корсис ас йӧз дінӧ писькӧдчан туйяс. Бӧрынджык дорйысьысьяслӧн юкӧн сяммис писькӧдчыны федеральнӧй войскалӧн шӧр вынъяс дорӧ[7].

Алексеевӧс гуалісны Сыктывкарса Гӧрд Затонса шойнаӧ[7].

Россия Федерацияса Президентлӧн 1996 во кӧч тӧлысь 9-ӧд лунся Индӧдӧн «воинскӧй долг олӧмӧ пӧртігӧн петкӧдлӧм повтӧмлунысь да героизмысь» подполковник Александр Алексеевлы кувсьӧм бӧрас сетӧма Россия Федерацияса Геройлысь ним[7].

Наградаяс

• Россияса Герой ним (1996);
• «Зарни Кодзув» медаль (1996);
• «За трудовую доблесть» медаль (1981);
• «Бур службаысь» III тшупӧда медаль.

Паметь

• Сыктывкарын Коми Республикаын ФБС-лӧн Управлениекӧд орччӧн Алексеевлы сувтӧдӧма бюст да казьтылан пас (2000)[8][9].
• 2010 воын Россияса ФБС-са директорлӧн тшӧктӧдӧн А. И. Алексеевӧс нэм кежлӧ пыртӧма Коми Республикаын ФБС-лӧн веськӧдланінса личнӧй состав лыддьӧгӧ[7].
• Коми Республикаса Уква карын Александр Алексеевлысь нимсӧ сетӧма 3 №-а школалы, кӧні сійӧ велӧдчис, а сідзжӧ сы бердын быд во уджалысь челядьлы республикаса военно-полевӧй лагерлы[10][11][12].
• 1999 вося йирым тӧлысь 8-ӧд лунӧ Алексеев нима 3 №-а школа дорӧ сувтӧдӧмаӧсь казьтылан пас[6]; школа холлын сувтӧдӧма мемориальнӧй пӧв (2010)[7][13].
• Мемориальнӧй пӧвъяс сувтӧдӧма сідзжӧ стрӧйба вылӧ, кӧні водзті вӧлі Уква карын СССР-са КГБ веськӧдланін, да Укваса канму техническӧй университетын (2012 вося йирым тӧлысь)[14][15].
• А. И. Алексеевлысь нимсӧ сетӧма Уква карса рытыв-войвыв районын уличалы[16].
• 2017 вося ӧшым тӧлысьын Уква карын восьтісны Александр Алексеевлы паметник[17].
• 2018 воын сылы сетісны «Коми Республикаса Почёта гражданин» ним Коми Республикаса Юралысьлӧн 2018 во моз тӧлысь 3-ӧд лунся 56 №-а Индӧдӧн[3] [18].
• «Юрган» телеканал дасьтіс документальнӧй сюжет: Памяти А.Алексеева.
• Грозный карын А. Алексеевлысь нимсӧ сетӧмаӧсь Октябрса районын уличалы[19].

  • Укваын А.Алексеевлы паметник

    Укваын А.Алексеевлы паметник

  • Сыктывкарын А.Алексеевлӧн бюст

    Сыктывкарын А.Алексеевлӧн бюст

  • Укваса канму техническӧй университетын казьтылан пӧв

    Укваса канму техническӧй университетын казьтылан пӧв

  • Уква карын (Чибью ул., 54) казьтылан пӧв

    Уква карын (Чибью ул., 54) казьтылан пӧв

Пасйӧдъяс

  1. ↑ Власова А., Козулин А. Алексеев Александр Иванович // Республика Коми. Энциклопедия. Том III. — Сыктывкар: Коми книжное издательство, 2000. — С. 357-358.
  2. ↑ Лобанов В.П. Книга памяти Республики Коми.Они живы в памяти нашей... Сыктывкар, 2023.
  3. ↑ 1 2 Александр Алексеев стал Почетным гражданином Республики Коми
  4. ↑ Книга почёта Республики Коми
  5. ↑ Уроженцы Коми - Герои России: кто они
  6. ↑ 1 2 3 О школе
  7. ↑ 1 2 3 4 5 6 7 8 9 10 Алексеев Александр Иванович (рус.). Сайт «Герои страны».
  8. ↑ Памятный знак в Сыктывкаре. Сайт «Герои страны». Шыӧдчан кадпас: 21 йирым тӧлысь 2017. Архивируйтӧма 21 йирым тӧлысь 2017.
  9. ↑ В Коми вспоминают Героя России - сотрудника ФСБ Александра Алексеева
  10. ↑ Школа носит имя А.И. Алексеева. Школа № 3 г. Ухта (13 сора тӧлысь 2013). Шыӧдчан кадпас: 21 йирым тӧлысь 2017. Архивируйтӧма оригинала 21 йирым тӧлысь 2017 года.
  11. ↑ Военно-полевой лагерь имени Алексеева. Официальный портал МОГО «Ухта» (8 лӧддза-номъя тӧлысь 2015). Шыӧдчан кадпас: 21 йирым тӧлысь 2017. Архивируйтӧма 21 йирым тӧлысь 2017.
  12. ↑ В Ухте прошел XI военно-полевой лагерь имени Александра Алексеева. Газпром (6 лӧддза-номъя тӧлысь 2016). Шыӧдчан кадпас: 21 йирым тӧлысь 2017. Архивируйтӧма 21 йирым тӧлысь 2017.
  13. ↑ 8 октября 1999 года в Ухте открыт памятный знак подполковнику ФСБ А. И. Алексееву, первому в Республике Коми Герою России
  14. ↑ Команда Усть-Вымского района увезла из Ухты переходящий кубок, учрежденный Управлением ФСБ России по Коми. Комиинформ - Новости Республики Коми (3 лӧддза-номъя тӧлысь 2013). Шыӧдчан кадпас: 28 урасьӧм тӧлысь 2018. Архивируйтӧма 28 урасьӧм тӧлысь 2018.
  15. ↑ ПАМЯТИ ГЕРОЯ РОССИИ АЛЕКСАНДРА АЛЕКСЕЕВА ПОСВЯЩАЕТСЯ… Официальный сайт Ухтинского государственного технического университета (2 йирым тӧлысь 2012). Шыӧдчан кадпас: 28 урасьӧм тӧлысь 2018. Архивируйтӧма 28 урасьӧм тӧлысь 2018.
  16. ↑ Улицы Алексеева и Победы появились в Ухте. Новостной портал «Ухта24» (8 ода-кора тӧлысь 2015). Шыӧдчан кадпас: 28 урасьӧм тӧлысь 2018. Архивируйтӧма 28 урасьӧм тӧлысь 2018.
  17. ↑ Погибшему за нас и во имя России. Портал Администрации МОГО "Ухта" (21 ӧшым тӧлысь 2017). Шыӧдчан кадпас: 28 урасьӧм тӧлысь 2018. Архивируйтӧма 28 урасьӧм тӧлысь 2018.
  18. ↑ Почётные граждане. Портал Администрации МОГО "Ухта". Шыӧдчан кадпас: 2 вӧльгым тӧлысь 2018. Архивируйтӧма 2 вӧльгым тӧлысь 2018.
  19. ↑ Алексеев Александр Иванович

Литература

  • Курочкин М. Подвиг в Грозном // Связь времён. — Сыктывкар, 2000. — С. 759.

Ыстӧгъяс

Босьтӧма "https://kv.ruwiki.ru/w/index.php?title=Алексеев_Александр_Иванович&oldid=471274"-ысь