Алексеев Евгений Михайлович
| Алексеев Евгений Михайлович | |
|---|---|
 | |
| Чужан лун | 1934 вося ӧшым тӧлысь 29-ӧд лун |
| Чужанін | Межӧг, Емдін район, Коми АССР |
| Кулан лун | 2024 вося лӧддза-номъя тӧлысь 2-ӧд лун |
| Куланін | Уква кар, Коми Республика |
| Канму |
 СССР →  Россия |
| Ошканпасъяс да премияяс |
|
Алексеев Евгений Михайлович (1934 вося ӧшым тӧлысь 29-ӧд лун, Коми АССР-ын Емдін районса Межӧг сикт — 2024 вося лӧддза-номъя тӧлысь 2-ӧд лун, Уква кар, Коми Республика) — Коми Республикаса оланін да коммунальнӧй овмӧс юкӧнын нималана ветеран, Коми Республикаса Почёта гражданин (2022).
Коми Республикаса Юралысьлӧн 2022 во моз тӧлысь 5 лунся 89 №-а Индӧдӧн сетӧма «Почёта гражданин» Коми Республикаса медвылыс почёт ним[1].
Олантуй
Чужис 1934 вося ӧшым тӧлысь 29-ӧд лунӧ Коми АССР-ын Емдін районса Межӧг сиктын. Регыд семьяыс вуджис овны Кардорса Ирта сиктӧ, кытчӧ вуджӧдісны уджавны батьсӧ. Сійӧ сизим арӧссянь уджалӧма Будённый нима татчӧс колхозлӧн муяс вылын да видзьяс вылын. Челядь война кадӧ да войнабӧрся медводдза воясӧ зіля отсасисны верстьӧ йӧзлы, торйӧн кӧ, турун пуктігӧн. 1949 воын помаліс татчӧс сизим вося школа, пырис сэсся Яренскса шӧр школаӧ кӧкъямысӧд классӧ[2].
1953 воӧ помаліс Микунь карын 1 №-а кӧрт туй училище[3].
1953 восянь 1971 воӧдз уджаліс Микуньын локомотив депоын[3].
1955—1959 воясӧ служитіс Саридзвыв Военнӧй флотын, Новая Земля дівывса Белужья Губа посёлокын, кӧні вӧлі атомнӧй да водороднӧй ӧружие испытайтӧм кузя 6 №-а ядернӧй полигонса штаб[4]. Выль сикас атомнӧй да водороднӧй ӧружьелысь испытаниеяс бура нуӧдӧмысь 1958 воын сылы сетісны Ленин орден[3].
1971 воӧ Е. М. Алексеевӧс бӧрйисны Микунь карын Уджалысьясысь бӧрйӧм депутатъяслӧн сӧветса исполкомӧн веськӧдлысьӧн, а 1975 воын — индісны Вуктыл районын Войтырысь бӧрйӧм депутатъяслӧн сӧветса исполкомӧн веськӧдлысьӧн. Сылӧн юрнуӧдігӧн Микунь да Вуктыл каръяс ёна вежсисны-бурмисны: стрӧитісны-дзоньталісны туйяс, олан керкаяс, социальнӧй объектъяс[3].
1978 восянь 1990 воӧдз Евгений Михайлович уджаліс Уква карса исполкомын оланін да коммунальнӧй овмӧс серти веськӧдлысьӧс вежысьӧн. Сылӧн юрнуӧдігӧн карын бурмӧдісны оланін да коммунальнӧй юкӧнын уджсӧ, бырӧдісны Уква бурмӧдӧм-мичмӧдӧм серти уна мытшӧд[3].
1990 воӧ Е. М. Алексеевлӧн водзмӧстчӧмӧн да зільӧмӧн Укваын заводитіс уджавны «Горзеленхоз» предприятие, кӧні Евгений Михайлович директораліс сійӧс восьтӧмсяньыс 2007 воӧдз. Сылӧн юрнуӧдігӧн «Горзеленхоз» вӧлі медбур муниципальнӧй учреждениеясысь ӧтиӧн, унаысь вермыліс россияса конкурсъясын[3].
Евгений Михайлович Алексеев — йӧзкотыр олӧмын водзмӧстчысь. Сійӧс бӧрйылісны СССР-са 7-ысь бӧръян Медвылыс Сӧветын Войтырлӧн сӧветса депутатӧн, Коми АССР-са 8-ысь бӧръян Медвылыс Сӧветса депутатӧн[3].
Куліс 2024 вося лӧддза-номъя тӧлысь 2-ӧд лунӧ Уква карын[5].
Наградаяс
• Ленин орден (1958),
• «Коми АССР-са йӧзкостса овмӧсын нимӧдана уджалысь»,
• «Россияса оланін да коммунальнӧй овмӧсын почёта уджалысь» нимъяс,
• «Уква карса почёта гражданин» ним.
Пасйӧдъяс
- ↑ Высшее почётное звание Республики Коми «Почётный гражданин» присвоено Евгению Алексееву и Анне Молий, Официальный сайт Республики Коми. Шыӧдчан кадпас: 24 рака тӧлысь 2025.
- ↑ Евгений Алексеев: Мне не стыдно смотреть людям в глаза, Северные ведомости. Шыӧдчан кадпас: 24 рака тӧлысь 2025.
- ↑ 1 2 3 4 5 6 7 Книга почёта Республики Коми
- ↑ Памяти Почетного гражданина Республики Коми Евгения Алексеева, Колокол Севера. Шыӧдчан кадпас: 24 рака тӧлысь 2025.
- ↑ Ушел из жизни почетный гражданин Коми и Ухты Евгений Алексеев, KOMI.KP. Шыӧдчан кадпас: 24 рака тӧлысь 2025.