Кремс Андрей Яковлевич

Босьтӧма Рувикиысь
Рувикиын эмӧсь мукӧд йӧз йылысь статьяяс, кодъяслӧн овыс Кремс.
Андрей Яковлевич Кремс
Кремс-Андрей-Яковлевич-215x300.jpg
Чужан лун 1899 вося сора тӧлысь 17-ӧд лун
Чужанін Баку, Россия империя
Кулан лун 1975 вося ода-кора тӧлысь 31-ӧд лун
Куланін Ухта,
Коми АССР, РСФСР, СССР
Канму  СССР
Наука юкӧн геология
Учёнӧй степень геолого-минералогическӧй наукаяс доктор
Наградаяс да премияяс

Социалистическӧй Уджвывса Герой

Ленин орден Ленин орден Ленин орден Орден Трудового Красного Знамени
Орден Трудового Красного Знамени Гӧрд Кодзув орден Гӧрд Кодзув орден «1941—1945 воясся Айму вӧсна Ыджыд тышын Германияӧс вермӧмысь» медаль
Сталинская премия — 1951 ZDNT RSFSR.jpg Коми Республикаса Почёта гражданин

Кремс Андрей Яковлевич (1899 вося сора тӧлысь 17-ӧд лун, Бакусянь неылын Зюд-Остов-Култук посёлок — 1975 вося ода-кора тӧлысь 31-ӧд лун, Ухта) — Ухтаса территориальнӧй геологическӧй веськӧдланінын медшӧр геолог, наука серти веськӧдланінса начальникӧс вежысь. Геолого-минералогическӧй наукаяс доктор[1]. Коми Республикаса Почёта гражданин (2024 во)[2].

Олантуй

Чужис 1899 вося сора тӧлысь 5 (17) лунӧ Бакусянь неылын Зюд-Остов-Култук посёлокын чери кыйысьлӧн семьяын. Помаліс куим класса вичкобердса школа, а сэсся Бакуын квайт класса училище. 16 арӧсӧн коли бать-мамтӧг, ыджыдджык чой-вок дӧзьӧр улын. Том дырйиыс висьмӧма тифӧн, висьӧмысла сійӧ лоӧма пельтӧмӧн.

1915 воын пырис велӧдчыны Бакуса политехническӧй училищеӧ, сійӧс помалӧм бӧрын босьтіс техник-нефтепромысловиклысь квалификация. Уджаліс Азербайджанса прӧмыселъяс вылын Балаханскӧй геологическӧй бюроын чертитчысьӧн, коллекторӧн, геологӧн, старшӧй районнӧй геологӧн.

1921-1931 воясӧ заочнӧя велӧдчӧма Мусир да промышленносьт кузя Азербайджанса канму университетын «нефтепромысловӧй делӧ» специальносьт серти, босьтӧма инженер-геологлысь диплом. Регыд мысти лоис «Азнефтьса» медшӧр геологӧн.

1934 воын Кремсӧс корӧмаӧсь уджавны Москваӧ, индӧмаӧсь СССР-са сьӧкыд промышленносьт кузя народнӧй комиссариатлӧн мусир промышленносьт медшӧр управлениеын медшӧр геологӧн.

Тайӧ жӧ кадас сійӧ веськӧдліс Москваса мусир институтын (ӧні - Мусир да биару Россияса канму университет) мусир да биару куйлӧдъяс перъян кафедраӧн.

1936 воын мусир промышленносьтса специалистъяслӧн группаын вӧлі командировкаын АӦШ-ын, тӧдмасис сэні мусир да биару куйлӧдъяс корсьӧмӧн, разведкаӧн да перйӧмӧн.

1930-ӧд вояс помын, СССР пасьта мусир перйӧм кузя план серти обязательствояс кык пятилетка чӧж олӧмӧ пӧрттӧм бӧрын, Америкаӧ ветлысьясӧс ставнысӧ репрессируйтісны, унджыксӧ лыйлісны.

1938 вося кӧч тӧлысь 30-ӧд лунӧ А. Я. Кремсӧс арестуйтӧмаӧсь. СССР-са НКВД бердын торъя совещаниелӧн 1939 вося ода-кора тӧлысь 29-ӧд лунся шуӧмӧн сійӧс пуксьӧдӧмаӧсь кӧкъямыс во кежлӧ лагерӧ «троцкистскӧй организацияын участвуйтӧмысь» да шпионажысь. Мыжсӧ вештӧм могысь мӧдӧдісны Коми АССР-ӧ, Чибью посёлокӧ (бӧрынджык Ухта)[3]. Тані Кремсӧс индісны Ярегаса медводдза номера нефтешахта проектируйтан сӧмын на котыртӧм бюроса коллекторӧн. Ярегаса куйлӧдысь «сьӧкыд мусирсӧ» позис перйыны сӧмын шахта способӧн, мыйӧн водзті СССР-ын эз вӧдитчывны.

1939 вося кӧч тӧлысьын примитіс ярегаса шахтаысь медводдза мусир[4].

Кремс петкӧдліс асьсӧ грамотнӧй геологӧн, и регыд сылы тшӧктісны лӧсьӧдны шахта проектлы геологическӧй подулалӧмлысь юкӧн, мый сійӧ и вӧчис зэв бура. Сэсся сійӧ ачыс выступайтіс Москваын проектсӧ подулалӧмӧн СССР-са НКВД-лӧн медвылыс веськӧдлысьяс дырйи, коді сэки курируйтіс геология туялӧмъяс да зэв колана мупытшса озырлунъяс перйӧм.

СССР-са пытшкӧсса делӧяс кузя народнӧй комиссарлӧн 1940 во сора тӧлысь 11-ӧд лунся приказӧн А. Я. Кремсӧс кадысь водз мездӧмаӧсь да пуктӧмаӧсь лагерса начальникӧс вежысьӧн да геологоразведочнӧй отделса начальникӧн. Кремсӧс кадысь водз мездӧм йылысь ходатайствуйтіс НКВД органъяс водзын академик А. Е. Ферсман, коді таӧдз воліс Ухтаӧ да сэні сёрнитіс Андрей Яковлевичкӧд. Мӧд версия серти, кадысь водз лэдзны отсаліс ачыс Л. П. Берия[3][5].

1942 воын А. Я. Кремсӧс индісны «Ухтижемстройса» медшӧр геологӧн.

1944 воын судимосьтсӧ вӧлі киритӧма; реабилитируйтӧма 1956 воын.

34 во чӧж А.Я. Кремс юрнуӧдіс мупытшса озырлун корсян уджъясӧн да наука туялӧмъясӧн. Тайӧ кадас вӧлі восьтӧма комынысь унджык мусир да биару куйлӧд, на лыдын шоча паныдасьлысь Рытыввыв Тэбукса да Усинскса мусир куйлӧдъяс, Вуктылса биару конденсат куйлӧд да мукӧд. Тайӧ аддзӧмторъясыс сетісны позянлун лӧсьӧдны Коми Республикаын мусир да биару перъян да переработайтан гырысь производствояс, Россияса регионъясӧ мусир да биару проводъяс.

Веськӧдліс Коми АССР-ын «Газпром ВНИИГАЗ» филиалса отделӧн. А. Я. Кремс зіля пырӧдчис Уква карлӧн да Коми Республикалӧн олӧмӧ. Медводдзаяс лыдын вӧзйис восьтыны Укваын мусир нырвизь серти вылыс тшупӧда велӧдчанін, да кыдзи наукаяс доктор 1967-1969 воясӧ удждон босьттӧг веськӧдліс Укваса индустриальнӧй институтлӧн геология кафедраӧн.

Уджаліс Анна Молийкӧд[6], 1969 воын найӧ гӧтрасисны [7].

Кувсис кадысь водз 1975 вося ода-кора тӧлысь 31-ӧд лунӧ. Гуалӧма Укваын, Загородная уличаса шойна вылын.

Наука уджъяс

250 наука удж, нёль небӧг, журналъясын статьяяс, газет лист бокъяс вылын уна выступление, 70 йӧзӧдлытӧм отчёт да записка.
Монографияяс:
• «Вопросы формирования структур и залежей нефти и газа Южного Тимана»;
• «Основы шахтной разработки нефтяных месторождений»;
• «История советской геологии нефти и газа»

Наградаяс да премияяс

• Социалистическӧй Уджвывса Герой (1969 вося сора тӧлысь 16-ӧд лун) — мусир да биару геологоразведочнӧй уджъяс сӧвмӧдӧмын ыджыд заслугаясысь да 70 во тырӧмкӧд йитӧдын[8];
• Коми АССР-са наукаын да техникаын нимӧдана уджалысь (1944)[1];
• РСФСР-са наукаын да техникаын нимӧдана уджалысь (1946)[1];
• коймӧд тшупӧда Сталин премия (1951) — мупытшса озырлунъяс восьтӧмысь;
• куим Ленин орден (1931, 1952, 1969)[9];
• кык Уджвывса Гӧрд Дӧрапас орден (1944, 1966)[1];
• кык Гӧрд Кодзув орден (1945, 1946)[1];
• медальяс;
• Ухтаса Почёта гражданин (1973)[1];
• Коми Республикаса Почёта гражданин (2024 во). Нимсӧ сетӧма Коми Республикаса Юралысьлӧн 2024 во моз тӧлысь 19-ӧд лунся 98 №-а Индӧдӧн[2] [10].

Паметь

• А.Я. Кремслысь нимсӧ пыртӧма Коми АССР-лӧн Нэмӧвӧйся Удж Слава Небӧгӧ[4].
• 1975 воын учёнӧйлысь нимсӧ сетӧмаӧсь уличалы, кӧні 3 №-а керкаын сійӧ олӧма 1959 восянь.
• 1983 воын сылӧн уджалан кабинетыс лои А. Я. Кремслӧн музей-патераӧн, керка вылас сувтӧдӧма мемориальнӧй пӧв.
• сылысь нимсӧ сетӧма Ухтаса канму техническӧй университетлӧн велӧдан-геология музейлы [4].
• Учёнӧй нимӧн шуӧма Роч платформа дорын брахиопод класса позвоночниктӧмъяслысь сикас.
• Кувсьӧм бӧрас сетӧма «Ухтаын ХХ нэмся олысь» ним. Сы йылысь вӧлі вӧчӧма документальнӧй кино, гижӧма небӧг.

Пасйӧдъяс

  1. ↑ 1 2 3 4 5 6 Козулин А., Фишман М. Кремс Андрей Яковлевич // Республика Коми. Энциклопедия. Том II. — Сыктывкар: Коми книжное издательство, 1999. — С. 155.
  2. ↑ 1 2 Глава Республики Коми Владимир Уйба подписал Указ о присвоении высшего почётного звания Республики Коми «Почётный гражданин» в 2024 году
  3. ↑ 1 2 Владимиров Е. Андрей Кремс. Главный геолог Ухты
  4. ↑ 1 2 3 Книга памяти Республики Коми.pdf
  5. ↑ Бобраков И. Злоключения «Ухтинца XX века». Судьба не раз сводила геолога Кремса с Берией, иногда со счастливым концом
  6. ↑ Легендарный директор, Почетный гражданин, Регион. Шыӧдчан кадпас: 24 рака тӧлысь 2025.
  7. ↑ [https://ourbaku.com/index.php/Молий_Анна_Яковлевна-_нефтяник,_почетный_гражданин_г._Ухты Молий Анна Яковлевна - нефтяник, почетный гражданин г.Ухты], Наш Баку. Шыӧдчан кадпас: 24 рака тӧлысь 2025.
  8. ↑ 16 июля 1969 года Андрею Яковлевичу Кремсу присвоено звание Герой Социалистического труда
  9. ↑ Кремс Андрей Яковлевич / Г. П. Хомизури // Большая российская энциклопедия : [в 35 т.] / гл. ред. Ю. С. Осипов. — М. : Большая российская энциклопедия, 2004—2017.
  10. ↑ Глава Коми присвоил высшее почетное звание республики выдающимся ветеринару, геологу и строителю

Литература

• Звягинцев В. Трибунал для академиков М. Терра, 2009
• Новикова Т. Т. Главный геолог юга и севера : художественно-документальная повесть об А. Я. Кремсе / Т. Т. Новикова ; Гос. учреждение высш. проф. образования Ухтинский гос. технический ун-т. - Ухта : УГТУ, 2014. - 55 с. : ил. - (Серия "Остаюсь с вами...").

Ыстӧгъяс

• А.Я. Кремс на сайте РГУ нефти и газа им. И. М. Губкина
• Библиография в информационной системе «История геологии и горного дела» РАН.

Босьтӧма "https://kv.ruwiki.ru/w/index.php?title=Кремс_Андрей_Яковлевич&oldid=479149"-ысь